मन्दिर परिसरमा दलित बालकले पानी खाँदा कुटपिट

प्रकाशित मिति: September 13, 2018 8:48 am

भदौ २८, काठमाडौं – त्रिभुवन राजमार्गसँगै जोडिएको बाराको परवानीपुर गाउँपालिकामा गत आइतबार मन्दिर परिसरमा रहेको चापाकलमा एक दलित बालकले पानी खाएको विषयमा कुटपिट गरिएको छ । घाइतेको वीरगन्ज महानगरपालिका–१४ स्थित वीरगन्ज हेल्थ केयर अस्पतालमा उपचार भइरहेको छ ।
घाइते मध्येका ३५ वर्षीय सुमन रामको मेरुदण्डमा चोट लागेकाले उनको अवस्था चिन्ताजनक रहेको अस्पतालले जनाएको छ।

अन्य दुईजनाको उपचार चलिरहेको छ। परवानीपुर गाउँपालिका–३ का वडाअध्यक्ष अनिल रामका अनुसार आइतबार साँझ १० वर्षीय बालक राकेश राम श्रीराधा कृष्ण मन्दिर परिसरमा खेल्ने क्रममा त्यही रहेको चापाकलमा पानी पिएका थिए। मन्दिरका पुजारीले दलितको छोरा भएर किन पानी खाएको भन्दै २/३ थप्पड हिर्काउँदै धपाए। राकेशले आफ्नो आमालाई उक्त घटना बताएपछि उनीहरु पुजारीकोमा पुगेका थिए।

वडाअध्यक्षका अनुसार बच्चाले पानी खाँदैमा किन पिटेको भनि आमाले आक्रोश पोखिन्। ‘त्यसबखत मन्दिरमा उपस्थित वडाका केही भद्रभलादमीहरुले दुवै पक्षलाई सम्झाई बुझाई फर्काएका थिए,’ बुधबार अस्पतालमा भेटिएका वडाअध्यक्ष रामले भने, ‘त्यसपछि केही बेरमै एक्कासी झडपको अवस्था आयो, दुबै पक्षलाई सम्झाउने क्रममा ढुंगा प्रहारले म आफैं घाइते भएँ।’

घाइते भएका उमेद रामले मुलुकबाट छुवाछुत प्रथा कानुनीरुपले हटिसके पनि पानी खाएकै विषयमा मरणासन्न हुने गरी पिटाई खाएको गुनासो गरे। ‘मन्दिरको चापाकलमा पानी खाएकै विषयमा किन कुटपिट गरेको भन्दै हामी बुझ्न मन्दिर पुगेका थियौँ,’ अस्पतालमा उपचार गराइरहेका रामले भने, ‘त्यहाँ रहेका प्रहरीले हामीलाई फर्काए।’

उनका अनुसार घर फर्किने क्रममा बाटोमै वडाअध्यक्ष अनिल भेटिए। ‘घटना बारे छलफल गर्दै थियौं अचानक पछाडिबाट केही व्यक्ति आएर आक्रमण गरे,’ उनले भने, ‘मेरो छोरा र माहिलो भाईलाई पनि कुटे।’

चार दिन अगाडिको उक्त घटना सम्झिँदै उनी बारम्बार भक्कानिएका थिए। उमेद उपचार गराइरहेका शैय्याकै छेउमा उनका १७ वर्षीय छोरा आकाश रामको पनि उपचार भइरहेको छ। बाँसको भाटाको प्रहारले उनको टाउको फुटेको छ। बायाँ आँखामा र शरिर भरि डाम छ। टाउकोमा तीनवटा टाँका लागेको छ।

‘सरकारले छुवाछुत हटाएको भनेपनि आज यस्तो अवस्था भोग्नुपर्‍यो,’ गम्भीर बन्दै उमेदले प्रश्न गरे, ‘के दलितको घरमा जन्मिनु अपराध हो।’ सोही अस्पतालको आईसीयू कक्षमा उनका महिलो भाई सुमनको उपचार भइरहेको छ।

‘व्यायाम गर्ने रडले भाइलाई पिठ्यँुमा हिर्काएका थिए,’ उनले भने, ‘भाइको शरिरको बाँया भाग सुन्निएको छ, हात र खुट्टा चलेका छैनन्।’

आकाशका अनुसार मन्दिरका पुजारीले बच्चा पिटे तर, अर्को पक्षले ‘तिमीहरुले किन बाबालाई पिटिस्’ भन्दै हामीमाथि आक्रमण गरे, सम्झाउन गएका सुमन काका भुइमा लडेपछि रडले हिर्काए। उनका अनुसार घर अगाडि नै त्यो समूहले पिटेको थियो। कान्तिपुर दैनिकमा खबर छ ।

सम्बन्धित शीर्षकहरु

जुवाको खालबाट पाँचजना उद्योगपति पक्राउ

कार्तिक २६, काठमाडौं – मोरङको बूढीगंगा गाउँपालिका–१ स्थित गंगाचोकबाट प्रहरीले ठूलो रकमसहित पाँचजना......

प्रधानमन्त्रीको शरीर कुकुरको टाउकोमा जोडेर फेसबुकमा सेयर गर्दा

कार्तिक २६, काठमाडौं – विद्यार्थी नेता प्रक्राउ परेको भन्दै विरोधमा आइतबार काभ्रेका सबै विद्यालय बन्द......